Wednesday, May 19, 2021

 ശൂന്യതയിലെ വിലാപം. ( കനൽ ഗ്രൂപ്പിലെ ചിത്രാധിഷ്ഠിതരചന )

-------------------------------------

ഇന്നിവിടെയാരുമി,ല്ലേകാന്തമീ ലോകം  

എന്തിനായ് ഞാൻ മാത്രമുഴലുന്നു ദൈന്യമായ്!

ഉതിരുവാനൊരുതുള്ളി കണ്ണുനീർപോലുമെ-

ന്നിരുൾവീണ കൺകോണിൽ ബാക്കിയില്ല. 

എല്ലാമെനിക്കന്യമായ്, മധുരമൊഴികളും 

സ്നേഹസൗരഭ്യം ചൊരിയും സ്മിതങ്ങളും 

കടമിഴിക്കോണിലൂടൊഴുകിയിങ്ങെത്തുന്ന 

പ്രണയസരിത്തിന്റെ കളകളധ്വനികളും

എന്തിനീ ജീവിതം ബാക്കിയാകുന്നെനി-

ക്കറിയില്ല, മരണമേ, സ്നേഹിപ്പൂ നിന്നെ ഞാൻ.

അർത്ഥിക്കയാണുഞാൻ ജഗദീശനോടിന്ന്

അതുമാത്രമെന്നിൽനീ ആശീർവദിച്ചിടൂ.