Wednesday, November 21, 2018

മകരസംക്രമം

ഉദയം..അരുണോദയം 
മകരസംക്രമസൂര്യോദയം 
പൊൻകിരണങ്ങളാലയ്യപ്പസ്വാമിക്ക് 
നെയ്യഭിഷേകം ചെയ്യാനായി 
സ്നാനംചെയ്തു  കരിമലകയറി 
ദിനകരനണയും പുണ്യോദയം.
ശകുന്തങ്ങൾ പാടുന്നു  സ്തുതിഗീതങ്ങൾ 
ശബരിഗിരീശനെ തുയിലുണർത്താൻ 
ഭക്തർതൻ ഹൃദയങ്ങൾ മിടിക്കുന്ന താളത്തി- 
ന്നുടുക്കിൻനാദങ്ങളുയരുന്നു മലമേലേ.   
കാനനലതകൾ സുഗന്ധപുഷ്പങ്ങളാൽ 
അർച്ചന ചെയ്യുന്നു  മണികണ്ഠനായ് 
പ്രാലേയപുണ്യാഭിഷേകം നടത്തുന്നു 
പുലരിയാം മാളികപ്പുറമേറെ മോദാൽ
കരിമലമുകളിലെ ഹരിഹരസുതനെ
കണ്ടുവണങ്ങാൻ പ്രകൃതീശ്വരിയും.
തൃപ്പടി കയറാനാവാത്ത ലക്ഷങ്ങൾ 
തിരുനാമമുതിർക്കുന്നു  ഭക്തിപൂർവ്വം.
തവതിരുപാദം ഞങ്ങൾക്കഭയം 
തവതിരുനാമം ഞങ്ങൾക്കമൃതം 
അനുഗ്രഹമേകൂ ശബരിഗിരീശ്വരാ 
 അഖിലാണ്ഡേശ്വരനയ്യപ്പാ.........

No comments:

Post a Comment