ലോലം

======

ലോലമെന്നതു പുലരിയാണെന്നു 

കരുതിയെന്നുടെ ബാല്യകാലത്തിൽ!  

എത്ര ലോലമീ ബാലസൂര്യന്റെ 

കൈവിരൽസ്പർശമെന്നതോർക്കുമ്പോൾ,

ലോലമാം കളകൂജനങ്ങളാൽ

പക്ഷികൾ സുപ്രഭാതമോതുമ്പോൾ,

മഞ്ഞുതുള്ളിതൻ നേർത്ത ചുംബനം 

പൂവിതൾത്തുമ്പിലിറ്റു വീഴുമ്പോൾ, 

പൈക്കിടാവിന്റെ പശിയടക്കുവാൻ 

അകിടിലമ്മതൻ സ്നേഹമൂറുമ്പോൾ,

ചിതറിവീഴുന്ന ചെറുമഴത്തുള്ളി-

നൂലുകൾ ശീതസ്പർശമേകുമ്പോൾ,

തഴുകി മെല്ലെക്കടന്നുപോകുന്ന 

കാറ്റുചൊല്ലുന്ന കഥകൾ കേൾക്കുമ്പോൾ,

മുകളിലാകാശവീഥിയിൽ വെള്ള-

മേഘജാലങ്ങൾ മേഞ്ഞുപോകുമ്പോൾ, 

പ്രകൃതിവീണയിൽ   ലോലഭാവങ്ങൾ 

പുലരിതൻ സ്നേഹതന്തി മീട്ടുന്നു. 

ശബളരാഗസുധാരവങ്ങളിൽ

അലിഞ്ഞുപോയ്  ഞാനുമൊരു തരംഗമായ്! 

.....................മിനി മോഹനൻ