Saturday, October 13, 2012

ഓണമെത്തി

ഓണമെത്തി
‌========
ഓണമായോണമായോണമായ്  മലയാള-
ക്കരയാകെക്കോടിയുടുത്തുവല്ലോ
കരിമേഘം മാറിയ മാനത്തു പൊന്നൊളി -
വീശിയാത്തമ്പുരാനെത്തിയല്ലോ
 ഇത്തിരിക്കുഞ്ഞനാം തുമ്പപ്പൂ വിരിയുന്ന
തൊടിയിലായ്പ്പൈതങ്ങളാടിത്തിമിര്‍പ്പൂ
 മുക്കുറ്റിപ്പൂവു പിണങ്ങി നില്‍ക്കുന്നതു
മന്ദാരം പുഞ്ചിരിച്ചെത്തി  നോക്കി
ചെമ്പരത്തിപ്പൂവും ചെത്തിയും ചുണ്ടത്തു
ചെഞ്ചായം പൂശിയൊരുങ്ങിയെത്തി
അഞ്ജനക്കണ്ണുമായ് കാക്കപ്പൂ വഴിയോര -
ത്തങ്ങനെ ശങ്കിച്ചുനിന്നിടുന്നു
ചെമ്പകമാട്ടെ പ്രാലേയം ചൂടിയി -
ട്ടിമ്പമോടങ്ങനെ പുഞ്ചിരിച്ചു
തുമ്പികള്‍ പാറിപ്പറക്കും പുഴയോര-
ത്താരോ കളിത്തോണി കൊണ്ടുവന്നു
തേന്മാവിന്‍ കൊമ്പത്തു കെട്ടിയൊരൂഞ്ഞാല-
ഉന്മേഷമോടതാ കാത്തു നില്‍പ്പൂ
ആരാണു വന്നെന്നെ പുല്കുവതാദ്യ -
മാത്തെങ്ങോലത്തുഞ്ചത്തു കൊണ്ടു പോകാം
ഒന്നതില്‍ക്കയറിയിട്ടാകാശമുറ്റത്തെ
വെണ്‍പൂവു തൊട്ടുമടങ്ങിയെത്താന്‍
ബാല്യത്തിലേയ്ക്കൊന്നു പോകാന്‍ കഴിഞ്ഞെങ്കി-
ലാകെയൊരിയ്കലെന്നാശിച്ചുഞാന്‍  .


4 comments:

  1. "ഒന്നതില്‍ക്കയറിയിട്ടാകാശമുറ്റത്തെ
    വെണ്‍പൂവു തൊട്ടുമടങ്ങിയെത്താന്‍
    ബാല്യത്തിലേയ്ക്കൊന്നു പോകാന്‍ കഴിഞ്ഞെങ്കി-
    ലാകെയൊരിയ്കലെന്നാശിച്ചുഞാന്‍ ."
    ഭാവനാ സുരഭിലവും സുന്ദരവുമായ ഓണ സ്മൃതികളുടെ ഊഞ്ഞാലിലേറ്റി
    അനുവാചകരെയും ചില്ലാട്ടം പറപ്പിച്ചു കളഞ്ഞു മിനി മോഹനൻ ഓണാശംസകൾ! kathirukaanakilikal.blogspot.com/‎
    by Tomy Jacob

    ReplyDelete
    Replies
    1. ഈ നല്ല വാക്കുകള്‍ക്ക് ഒരുപടു നന്ദി സര്‍

      Delete
  2. ഇന്ന് നമ്മൾ ഹൈ ടെക് ഓണം ആഘോഷിക്കുമ്പോൾ ............
    പഴയ കാല ഓണത്തെ കുറിച്ച് ആരെങ്കിലും ഒര്ക്കാൻ ശ്രമിക്കാറുണ്ടോ ....?

    ReplyDelete
    Replies
    1. നമുക്കു സ്വന്തം ഈ ഓര്‍മ്മകള്‍ മാത്രമല്ലേ...

      Delete