ശൂന്യത .....

കുന്നിന്‍ ചെരുവിലെ കൊച്ചുവീട്ടില്‍ ഇനി 

കാത്തിരിക്കാനെനിക്കമ്മയില്ല 

അഭയമേകുന്നൊരാ മൃദുലമാം കൈവിരല്‍ -

ത്തുമ്പെനിക്കെങ്ങൊ കളഞ്ഞുപോയി 

ഒരുകുഞ്ഞുപൈതലയായ് ചാഞ്ഞുറങ്ങാനെനി -

യ്കാമടിത്തട്ടിന്നു നഷ്ടമായി ... 

ഒരുപാടുസ്നേഹം നിറച്ചോരാപുഞ്ചിരി 

ഒന്നിനിക്കാണുവാനാവതില്ല .... 

ഓണവും വിഷുവുമിങ്ങെത്തുമ്പോള്‍ ഹൃദ്യമാം 

സദ്യയുണ്ടാക്കുവാനമ്മയില്ല 

ഉച്ചനേരത്തങ്ങകലേനിന്നെത്തുന്ന 

വാത്സല്യമണിനാദമോര്മ്മയായി 

ഒരുപാടുപേരുണ്ടു ചുറ്റിലുമെങ്കിലും 

അമ്മയാകാനമ്മതന്നെവേണം 

അമ്മതന്‍ സ്നേഹവും കരുതലും മാത്രമാ-

ണീലോകവാടിയിലേകസത്യം