Thursday, August 1, 2013

പനിനീര്‍പ്പൂവ്...

നിദ്രയാം രാവിന്‍പുതപ്പില്‍ നിന്നും
ഇന്നിന്‍പുലരിയുണര്‍ന്നെണീറ്റു

ചെറുകാറ്റുവീശുമ്പോളറിയാതെ പാടുന്നു
മനസ്സാകും വീണയില്‍ മേഘമല്‍ഹാര്‍

അതിലോലമാം ഗാനവീചീയില്‍പാദങ്ങ-
ളറിയാതെ മൃദുപദമാടിടുന്നു

വാര്‍മുകില്‍ മാനത്തു കൂടുകൂട്ടുമ്പോഴു-
മിടയിലൂടൂറുന്നു സൂര്യസ്മിതം

മുത്തമൊന്നേകിപ്പരിഭവം  മാറ്റുവാന്‍
പനിനീര്‍പ്പൂമൊട്ടിന്‍ കപോലമധ്യേ

പ്രണയം വിടര്‍ന്നൊരാപ്പൂവിന്റെ മധുഹാസം
പ്രണവമന്ത്രം പോല്‍ പരിപാവനം

ഇതള്‍ വിടര്‍ത്തുമ്പോഴോ നീളെപ്പരക്കുമീ
സ്വര്‍ഗ്ഗീയമാം ലോല വശ്യഗന്ധം

ഏതുകുംഭത്തിലൊളിച്ചുവെച്ചീരാഗ
ശോണിമയാര്‍ന്നൊരീ ചെമ്പനീര്‍പ്പൂ..

ഈമുഗ്ദ്ധ മന്ദഹാസം കണ്ട കണ്ണൂകള്‍-
ക്കീദിനം ശുഭകരം ധന്യധന്യം..

6 comments:

  1. കൊള്ളാം.....ന്നാലും ചില പ്രയോഗങ്ങള്‍ക്ക് എന്തോ ഒരിത്....

    ReplyDelete
    Replies
    1. വായനയ്ക്കും അഭിപ്രായത്തിനും വളരെ നന്ദി സര്‍

      Delete
  2. പനിനീര്‍പ്പൂവ് മനോഹരമായി

    ചേച്ചിയുടെ ബ്ലോഗില്‍ ഇതാദ്യം ആണെന്ന് തോന്നുന്നു......

    എല്ലാ രചനകളും ഇവിടുന്ടല്ലോ.. അമര്‍നാഥ് യാത്രയും എല്ലാം... ആശംസകള്‍

    ReplyDelete
    Replies
    1. എന്റെ നിശ്ശബ്ദതയിലേയ്ക്കു കടന്നു വന്നതിനും അഭിപ്രായം അറിയിച്ചതിനും വളരെ നന്ദി സാജന്‍. വീണ്ടും ഇവിടേയ്ക്കു സ്വാഗതം..:)

      Delete
  3. രചന വളരെ സുന്ദരം ആയി
    നല്ല വരികളും
    ആശംസകള്‍

    ReplyDelete
    Replies
    1. വളരെ നന്ദി ഗീത..

      Delete