Friday, March 28, 2014

വിഷുപ്പുലരി

മഞ്ഞനീരാടിയ കര്‍ണ്ണികാരപ്പൂക്കള്‍
മേടപ്പുലരിയില്‍ പുഞ്ചിരിക്കേ
ഓര്‍മ്മയിലോടിയിങ്ങെത്തുന്നു ബാല്യത്തിന്‍
കൈനീട്ട നാണയപ്പൊന്‍കിലുക്കം

രാവിലങ്ങെത്തും വിഷുക്കണി പേറിയ
രാപ്പാടിക്കൂട്ടം കണിപ്പാട്ടുമായ്
പൂമുഖവാതില്‍ തുറന്നങ്ങു നോക്കവേ
പൊന്‍കണി മുന്നില്‍ ജ്വലിച്ചുനില്‍ക്കും

കുളികഴിഞ്ഞെത്തുമ്പോള്‍ കൈകളില്‍ വന്നെത്തും
അമ്മതന്‍ കൈനീട്ട സ്നേഹഭാരം
പിന്നെയും കൈനീട്ടമെത്തിടും കൈകളില്‍
ബന്ധങ്ങള്‍ തന്നിഴ ചേര്‍ത്തു വെയ്ക്കാന്‍

നാവില്‍ നിറഞ്ഞു തുളുമ്പി നില്‍ക്കുന്നുണ്ടു
നന്മതന്‍ മധുരം നിറച്ച വിഷുവട
നാക്കിലത്തുണ്ടില്‍ നിരന്നിരിക്കും പിന്നെ
നാനാവിധം രുചിക്കൂട്ടുകള്‍ സദ്യയായ്

ആട്ടവും പാട്ടും കളിചിരിയാര്‍പ്പുമായ്
ആമോദമോടെ പറന്നങ്ങകന്നുപോം
ആദിത്യരശ്മികള്‍ പൊന്നാട ചാര്‍ത്തിച്ച
ആ മേടമാസത്തിന്‍ പൊന്‍വിഷുവാസരം

സന്ധ്യവന്നെത്തുമാക്കൂടെവന്നെത്തിടും
സന്ധ്യവിളക്കിന്‍ തിരിനാളവും
കത്തുമൊരായിരം പൂത്തിരി കയ്യിലും
കണ്ണിലും മാനത്തുമൂഴിയിലും

കത്തിയണയുമാ ദീപത്തുരുത്തുകള്‍
കാഴ്ചയായോര്‍മ്മയില്‍ തങ്ങിനില്‍ക്കും
കണികണ്ടുണരുവാനൊരുവിഷുപ്പുലരിയ്ക്കായ്
കാത്തിരിക്കാമിനി കൈകള്‍ കൂപ്പി....


4 comments:

  1. വിഷുപ്പുലരിയും കാത്ത്......
    കവിത നന്നായിട്ടുണ്ട്
    ആശംസകള്‍

    ReplyDelete
  2. വിഷുക്കണിക്കാലമാകുന്നു അല്ലേ?
    കവിത നന്നായിട്ടുണ്ട്

    ReplyDelete