Tuesday, February 10, 2015

തഴുതാമ.( നാട്ടുവഴിയിലെ പോസ്ട് )

തഴുതാമയില്‍ സ്വര്‍ണ്ണമുണ്ടത്രേ...
ആരു പറഞ്ഞു എന്നോര്‍മ്മയില്ല. എങ്കിലും കൗതുകത്തിനു കുറവില്ലല്ലോ. ഒന്നു ഗവേഷണം നടത്താമെന്നു തോന്നി. ഒരു തഴുതാമച്ചെടി മൊത്തമായി ഇഴകീറി  പരിശോധിച്ചു..എവിടെ..സ്വര്‍ണ്ണം പോയിട്ട് ഒരു സ പോലും കണ്ടില്ല...
പക്ഷേ പിന്നീടാണറിയാന്‍ കഴിഞ്ഞത്. സ്വര്‍ണ്ണത്തേക്കാളേറെ മൂല്യവത്തായ ഔഷധഗുണങ്ങളുള്ള സസ്യമാണത്രേ തഴുതാമ.
'പുനര്‍ന്നവ' എന്നാണ് സംസ്കൃതനാമം. വീണ്ടും ജനിപ്പിക്കാന്‍ കഴിയുന്നത്. പഥ്യാപുനർന്നവാദി കഷായം, പുനർന്നവാദി കഷായം, പുനർന്നവാസവം, വിദാര്യാദി കഷായം, അമൃതപ്രാശഘൃതം, സുകുമാരഘൃതം തുടങ്ങി അനവധി ഔഷധക്കൂട്ടുകളിൽ തഴുതാമ  മുഖ്യ ഘടകമാണ് എന്നതു തന്നെ ഈ സസ്യത്തിന്റെ മഹത്വം വിളിച്ചറിയിക്കുന്നു.

മുന്‍പൊക്കെ നമ്മുടെ ഇലക്കറികളില്‍ പ്രമുഖസ്ഥാനമായിരുന്നു തഴുതാമയ്ക്ക് . തഴുതാമയില തോരന്‍ ഒരു പ്രധന ഉപദംശമായിരുന്നു നമ്മുടെ ഉച്ച ഭക്ഷണത്തില്‍. പോഷകമൂല്യവും ഔഷധമൂല്യവും ആണിതിനു കാരണം. എല്ലാ വീട്ടുവളപ്പിലും പ്രത്യേകപരിചരണമൊന്നും കൂടാതെ തഴച്ചു വളര്‍ന്നിരുന്ന സസ്യമാണ് തഴുതാമ. ടര്‍ന്നു വളരുന്ന തഴുതാമയുടെ തണ്ടിന്റെയും പൂക്കളുടെയും നിറവ്യത്യാസമനുസരിച്ച് തരം തിരിക്കപ്പെട്ടിരിക്കുന്നു. ഇലയും മൃദുവായ തണ്ടും ചേര്‍ത്ത് പാചകത്തിനു ഉപയോഗിച്ചു പോന്നിരുന്നു.തഴിതാമയിട്ടു തിളപ്പിച്ച വെള്ലം നല്ലൊരു ദാഹശമനിയുമാണ്.  രക്തക്കുറവു പരിഹരിക്കാനും, മഞ്ഞപ്പിത്തം, വൃക്കരോഗങ്ങള്‍ എന്നിവ ഭേദമാക്കാനും തടയാനും മലശോധനയുണ്ടാകാനും അഗ്നിദീപ്തി വര്‍ദ്ധിപ്പിക്ക വഴി ഉന്മേഷം പ്രദാനം ചെയ്യാനും ഇത് ഏറെ സഹയകരമാണ്. പ്രകൃതിചികിത്സയില്‍ മൂത്രാശയരോഗങ്ങള്‍ക്കുള്ള പ്രധാന ഔഷധമാണ് തഴുതാമ. ശരിരത്തിലെ മാലിന്യങ്ങലെ നീക്കുവാനും മൂത്രാശയക്കല്ലിനെ പുറന്തള്ലാനും തഴുതാമയ്ക്കു കഴിയുമെന്നു പറയപ്പെടുന്നു. കഫദോഷങ്ങളെ ഇല്ലാതാക്കാനും ഹൃദയപ്രവര്‍ത്തനത്തെ ഉത്തേജിപ്പിക്കുവാനും ഏറെ ഗുണപ്രദമത്രേ. പേപ്പട്ടിവിഷത്തിനുള്ള മരുന്നുണ്ടാക്കുന്നതിനും തഴുതാമ ഉപയോഗിക്കുന്നുണ്ട്. ആമവാതം, ശരീരത്തിലെ നീര്, വേദന എന്നിവ മാറുന്നതിന് ഇത് ദിവസവും ഭക്ഷണത്തില്‍ ഉള്‍പ്പെടുത്തുന്നത് ഉത്തമമത്രേ. വാജീകരണൗഷധങ്ങളില്‍ തഴുതാമയുടെ വിത്ത് ഉപയോഗിക്കുന്നുണ്ട്. കാഴ്ചശക്തി വര്‍ദ്ധിപ്പിക്കാനും ഇന്‍സുലിന്‍ ഉദ്പാദനത്തെ ത്വരിതപ്പെടുത്താനും ത്വഗ്രോഗങ്ങലെ ചെറുത്തു നില്‍ക്കാനും ഇതിനു കഴിവുണ്ടെന്നാണ് വിദഗ്ദ്ധാഭിപ്രായം.


ആധുനികത ഗ്രാമങ്ങളില്‍ പോലും പടര്‍ന്നുകയറിയപ്പോള്‍ തൊടികളില്‍ പടര്‍ന്നു വളര്‍ന്നിരുന്ന തഴുതാമ അപ്രത്യക്ഷമായിക്കൊണ്ടിരിക്കുകയാണ്. ഒന്നു ശ്രദ്ധവെച്ചാല്‍ നമുക്ക് ഈ ഔഷധറാണിയെ വീണ്ടും നമ്മുടെ ജീവിതത്തിലേയ്ക്കു തിരികെ വിളിക്കാം. അനാവശ്യമായി മരുന്നുകള്‍ ഉപയോഗിക്കുന്നതില്‍ നിന്നും, ശസ്ത്രക്രിയകളില്‍ നിന്നുപോലും ചിലപ്പോള്‍ ഈ കൊച്ചു കൂട്ടുകാരി നമ്മെ രക്ഷിച്ചേക്കാം.


4 comments:

  1. തഴുതാമ തോരന്‍‌ ഇഷ്ടകറിയാണ്.
    ആദ്യമൊക്കെ പറമ്പില്‍ ധാരളമുണ്ടായിരുന്നു.
    നല്ല വിവരണം
    ആശംസകള്‍

    ReplyDelete
    Replies
    1. നന്ദി സര്‍, സന്തോഷം, സ്നേഹം .

      Delete
  2. ഇത്തരം ഔഷധ സസ്യങ്ങളുടെ ഗുണങ്ങളും ഉപയോഗവും വിശദമാക്കുന്ന മാറ്റ് പോസ്റ്റുകളും ഇന്നത്തെ ജീവിതത്തില്‍ ആവശ്യപ്പെടുന്നു.
    നന്നായിരിക്കുന്നു.

    ReplyDelete
    Replies
    1. നന്ദി സര്‍, സന്തോഷം, സ്നേഹം

      Delete