Tuesday, March 29, 2016

ആനന്ദം

അങ്ങു കിഴക്കന്‍ മലയും കയറിയാ
കുട്ടിക്കതിരവനെത്തുന്നു മെല്ലവേ
ഒത്തിരി പൊന്നിട്ട പേടകമാകാശ
മുറ്റത്തു കൊണ്ടുവന്നാകെച്ചൊരിയുന്നു
മിന്നിത്തിളങ്ങും വെയില്‍ പാറി വീഴുന്നു
കാഞ്ചനപ്പൂക്കളായ് മണ്ണില്‍ വിരിയുന്നു
വാസനച്ചെപ്പു തുറന്നുവെയ്ക്കുന്നിതാ
മുല്ലയും പിച്ചിയും ചെമ്പനീര്‍പ്പൂക്കളും
പൂമരച്ചില്ലവിട്ടെങ്ങോ പറക്കുന്നു -
ണ്ടായിരം പക്ഷികളാമോദക്കൂട്ടമായി..
മാകന്ദമഞ്ജരിത്തേന്‍ നുകര്‍ന്നേതോ
കോകിലം മധുരമായ് പാടുന്നു പ്രണയം
ആ ഗാനനിര്‍ഝരി കേട്ടു വരുന്നോരു
കാറ്റിന്റെ ചുണ്ടിലും സ്നേഹരാഗം 
ഈ സ്വര്‍ഗ്ഗഭൂമിയില്‍ ഇനിയെന്തു വെണമെന്‍
ഹൃദയത്തിനാനന്ദ നൃത്തമാടാന്‍!. 

2 comments:

  1. നല്ല വരികള്‍
    ആശംസകള്‍

    ReplyDelete