നിസ്തുലം നിർമ്മലം നിന്മുഖ പങ്കജം
നിർന്നിമേഷം നോക്കി നിൽപതീ ലോകം
സംശയമില്ല നീ ഭൂമിമാതവിനാൽ
സംപ്രീതയായോരുൽകൃഷ്ടരത്നം
ശസ്ത്രങ്ങളേൽപ്പിച്ചു നിൻശരീരത്തിലാ
ശത്രുവിൻ ക്രോധം വടുക്കളേകി
ആഴത്തിലേറ്റ മുറിവും നിണപ്പാടും
ആലേഖനം ചെയ്യും നിൻ ചരിത്രം
വേണ്ട നീ നോക്കേണ്ട പിന്നിട്ട പാതകൾ
വേറിട്ടതാണുനിൻ വിജയവീഥി
നിൻമുന്നിലറിവിൻ വിശാലമാം ലോകം
നിന്റെ സ്വപ്നങ്ങളിൽ നന്മ മാത്രം
വിടരട്ടെ നിൻ വഴിത്താരയിലായിരം
വിജയരേണുക്കൾ നിറഞ്ഞ പൂമൊട്ടുകൾ
നേരുന്നു കുഞ്ഞേ നിനക്കായി നന്മകൾ
നേരുന്നൊരായിരം സ്നേഹപുഷ്പങ്ങൾ .....
No comments:
Post a Comment